Plans de langue basque

Gaur egun, enpresek hizkuntza ugari darabiltzate. Enpresaren ardura da hizkuntza horiek guztiak erantzukizunez kudeatzea eta kudeaketa horretan euskara, hemengoa den neurrian, erdigunean kokatzea.

Hizkuntza orok behar ditu bere espazio propioak, normal garatzea nahi bada. Eta euskara hizkuntza minorizatua den neurrian, enpresek ekarpen garrantzitsua egin dezakete euskarari espazio propio horiek aitortzen.

Euskal hiztunek euskaraz lan egiteko eskubidea dute, eta enpresek langileei eskubide hori emateak eragin positiboa dauka langileek enpresarekiko duten atxikimenduan.

Herri gisa hezkuntzan euskara biziberritzeko egin dugun inbertsioak segida izan behar du lan munduan. Gainerakoan, kontraesankorra izateaz gainera, inbertsio galera handia litzateke.

Enpresak garrantzia ematen ari dira ukiezinen kudeaketari, ulertzen dutelako eragin positiboa dutela langileen gogobetetzean. Alde horretatik, adibide ezin hobea da enpresa askok euskararen kudeaketan egin duten ibilbidea.

Lantegia da langile askok euskaraz bizitzeko daukaten eremu bakarra, eta euskara plana duten enpresei esker dute aukera hori.

Hemengo punta-puntako enpresa batzuk euskaraz ari dira lanean, baina hori ez da ikusten kanpoan, eta, harrigarria bada ere, oraindik aldarrikatu egin behar dugu euskara lanerako hizkuntza izan daitekeela.

Erakundearen sisteman sartu eta hortik abiatzen dugu eraldaketa. Finean, lan hizkuntza aldatzea eraldaketa baita, berrikuntza bat. Bere lan hizkuntza aldatzea lortu duen erakundeak edozer egiteko gaitasuna irabazi du bidean.

Euskara planek sustatu nahi duten eraldaketan laguntzeko, U teoriara jo genuen. Ulertu dugu teoria bera ulertzeko probatu beharra dagoela, eta horretan ari gara.